माणुसकी की प्रोटोकॉल? अपघातग्रस्ताला घेऊन जाण्यावरून रुग्णवाहिका चालकाचा नकार; होळजवळ संतापजनक प्रकार..
केजहून परळीच्या दिशेने येत असताना होळ गावाजवळ अपघातग्रस्त वृद्ध इसमाला मदत करण्यासाठी थांबलेल्या नागरिकांनी दाखवली माणुसकी; मात्र 108 रुग्णवाहिका सेवेच्या कथित प्रोटोकॉलमुळे रुग्णाला अंबाजोगाईला नेण्यास नकार दिल्याचा आरोप
केज प्रतिनिधी
काल सायंकाळी साधारण ४ ते ५ वाजण्याच्या दरम्यान केजहून परळीच्या दिशेने येत असताना होळ गावाजवळ रस्त्यालगत एका इसमाची दुचाकी घसरून अपघात झाला. अपघातात अंदाजे ६५ वर्षीय इसमाच्या डोक्याला गंभीर दुखापत झाल्याचे दिसून आले. परिस्थितीचे गांभीर्य लक्षात घेऊन घटनास्थळी उपस्थित नागरिकांनी तातडीने मदतीसाठी 108 रुग्णवाहिका सेवेला फोन केला.
जखमी इसमाच्या मोबाईलवरून त्याच्या कुटुंबीयांशी संपर्क साधण्यात आला. त्यावेळी लातूर येथील त्याच्या कुटुंबातील एका महिलेशी संपर्क झाला. घरात पुरुष सदस्य उपलब्ध नसल्याने जखमीला अंबाजोगाई उपजिल्हा रुग्णालयात हलवावे, अशी विनंती करण्यात आली.
दरम्यान, केजकडून 108 रुग्णवाहिका येण्यापूर्वी बीडकडे जात असलेली नॅशनल रुग्णवाहिका सर्विसची एक रुग्णवाहिका घटनास्थळी आली. नागरिकांनी हात दाखवून ती थांबवली. या रुग्णवाहिकेत चालक व डॉक्टर उपस्थित होते. त्यांनी परिस्थिती समजून घेत, 108 लवकर आली तर ठीक; अन्यथा आम्ही रुग्णाला घेऊन जातो, असे सांगितल्याचे प्रत्यक्षदर्शींचे म्हणणे आहे. त्यानंतर जखमी इसमाला त्या रुग्णवाहिकेत बसवण्यात आले.
मात्र काही वेळातच 108 रुग्णवाहिका घटनास्थळी पोहोचल्यानंतर जखमीला पुन्हा त्या रुग्णवाहिकेतून बाहेर काढून 108 मध्ये बसवण्यात आले. यावेळी संबंधित चालकाने अंबाजोगाईला जाण्यास नकार दिल्याचा आरोप नागरिकांनी केला आहे. चालकाचे नाव हंगे असल्याचे सांगण्यात आले असून संबंधित 108 रुग्णवाहिकेचा क्रमांक MH 14 CL 0866 असल्याचे प्रत्यक्षदर्शींनी सांगितले.
नागरिकांच्या म्हणण्यानुसार, जखमीच्या कुटुंबीयांनी अंबाजोगाई येथे उपचारासाठी नेण्याची विनंती केली होती. मात्र चालकाने “प्रोटोकॉल पाळावा लागतो” असे सांगत अंबाजोगाईला जाण्यास नकार दिल्याचा आरोप आहे. एवढेच नव्हे तर जखमीला मदत करण्यासाठी जमलेल्या नागरिकांशीही यावेळी हुज्जत झाल्याचे सांगण्यात येत आहे.
माणुसकीपेक्षा प्रोटोकॉल मोठा?
अपघातग्रस्त व्यक्ती डोक्याला गंभीर मार लागलेल्या अवस्थेत असताना त्याला तातडीने योग्य उपचार मिळणे अत्यंत महत्त्वाचे असते. अशा परिस्थितीत रुग्णवाहिका कोणत्या रुग्णालयात रुग्णाला घेऊन जाणार, हे केवळ प्रोटोकॉलच्या आधारे ठरवायचे की रुग्णाची गंभीर अवस्था आणि उपलब्ध वैद्यकीय सुविधा पाहून निर्णय घ्यायचा? हा प्रश्न आता उपस्थित होत आहे.
जर त्या वेळी जखमीची प्रकृती अधिक गंभीर झाली असती किंवा उपचाराला विलंब झाल्यामुळे काही अनुचित प्रकार घडला असता, तर त्याची जबाबदारी नेमकी कोणाची असती? प्रोटोकॉलची की रुग्णवाहिका व्यवस्थेची? हा गंभीर सवाल नागरिकांकडून उपस्थित केला जात आहे.
घटनास्थळी उपस्थित नागरिकांनी मात्र कोणतीही अपेक्षा न ठेवता परिस्थितीचे गांभीर्य ओळखून जखमीला मदत करण्याचा प्रयत्न केला. त्यामुळे आता प्रशासनाने या संपूर्ण घटनेची निष्पक्ष चौकशी करून संबंधित रुग्णवाहिका चालकाने नेमका कोणता प्रोटोकॉल पाळला, अंबाजोगाईला रुग्ण नेण्यास नकार देण्याचे कारण काय होते आणि अशा परिस्थितीत अधिकृत नियम काय आहेत, याचा खुलासा करणे गरजेचे आहे.
रुग्णवाहिका सेवा ही केवळ नियम आणि प्रोटोकॉलसाठी नसून संकटकाळात रुग्णाचा जीव वाचवण्यासाठी आहे. नियम महत्त्वाचे आहेतच; पण जीव धोक्यात असताना माणुसकी, परिस्थितीचे गांभीर्य आणि तातडीचा उपचार यांनाही तितकेच महत्त्व मिळायला हवे.
आता या प्रकरणात संबंधित प्रशासन काय कारवाई करते आणि रुग्णवाहिका चालकाच्या भूमिकेची चौकशी कशी केली जाते, याकडे नागरिकांचे लक्ष लागले आहे.
“रुग्ण वाचवणे महत्त्वाचे की प्रोटोकॉल?” — या घटनेनंतर हा प्रश्न मात्र अनुत्तरित आहे.
Post a Comment